«استحملنا كتير».. عماد النحاس يخرج عن صمته بعد الفوز على الزمالك.. ماذا قال؟ - البطريق نيوز

عبر عماد النحاس، المدير الفني للنادي الأهلي، عن سعادته بالفوز الذي حققه فريقه، اليوم الإثنين، على حساب الزمالك، بنتيجة 2-1، في اللقاء الذي جمع الجانبين، مساء اليوم الإثنين، لحساب الجولة التاسعة من بطولة الدوري المصري.

وقال عماد النحاس، في تصريحات خلال المؤتمر الصحفي الذي أعقب لقاء القمة: «مبروك للأهلي وجماهيره واللاعبين.. كل الناس استحملت كتير».

وأضاف: «أقدر أقول الحمد لله إننا نجحنا في تحقيق المكسب والفوز، رغم بداية الزمالك والفرصتين إللي أهدرهم الزمالك».

واستطر عماد النحاس قائلا: «اتحسبلنا ركلة جزاء من نفس اللعبة، واتكلمنا مع اللاعبين إزاي نرجع للمباراة، ونجحنا في صناعة أكثر من فرصة ولعبنا كرة قدم بهدوء».

عماد النحاس: الفوز بيداري حاجات كتير

وأردف: «الفوز بيداري حاجات كتير، وأول مرة بالنسبة لي إني أدير مباراة قمة، بقول للزمالك هارد لاك».

وأضاف النحاس: «الفوز في المباريات اللي زي دي بيجي من التفاصيل الصغيرة، وبشكر اللاعبين على المجهود اللي اتبذل، واللاعبين قعدت أكتر من مرة مع بعض وتعاهدوا على الفوز».

وتابع مدرب الأهلي: «المباراة دي بداية جديدة لينا، ولو شريف ماسجلش فهو صنع.. لو التوفيق مش معاك حاول، وشريف كان عنده إحساس إنه هيجيب جول ولكن عمل مجهود كبير».

وواصل: «الماتش اللي فات اتكلمت على جراديشار إنه مصاب رغم استغراب الجماهير سبب استبداله، وزي ما قولت الفوز بيخلي الجماهير ماتتكلمش في تبديلات، ومافيش حاجة بنسيبها للظروف واتكلمنا كتير على ده».

وأكمل: «بشكر كل الجهاز الفني على الفوز، وعبد الرحمن عيسى مخطط أحمال الفريق قدر أنه يحط ايده على كل تفاصيل الحالة البدنية للاعبين، ونجح في رفع الكفاءة والقدرات البدنية لجميع اللاعبين بشكل رائع».

واستدرك: «ده كان أفضل ماتش لينا الموسم ده، لكن هنفضل نتكلم مع اللاعبين على الأخطاء، لأنه غاب عننا التركيز بداية المباراة».